10 Jahre Kammgarn Schaffhausen

27.10.2007 von Rosmarie Widmer Gysel

Liebi Kammgarn - du alti Trucke
Ich grüesse dich ond to mi pucke
Du fiirsch jo hüt a grosses Fäscht
Mit vill Traraa ond gladne Gäscht
Äexguesi för d'Trucke, bis mer nid bös
Aber de Typ (de Vetter) macht mich nervös!

Tänk, neulich bin ich i offizieller Mission
I de Weltstadt Züri - wa fören Hohn!
An e Jubiläumsparty iiglade gsii
Mit allne Schiggane sogar suurem Wii
Ond waasch wo me sid neuschtem zZüri tot fiire?
Jo los bigoscht guet - ich tue zitiire:

Im "Schweizer Kultur-Mekka"! So haast ez zmool
Di chürzlich kreirt Maag-Event-Hall.
En Grattel händs zZüri sisch zom Gruuse!
Debii - sid 10 Joohr giits zSchaffhuuse
Dich, liäbi Kammgarn, mit samt diner Beiz
Du zaagsch täglich allne wo wänd dini Reiz

Bisch nid eifach ä Härberg för Events ond Misswahla
Wo di obere 10tuusig jubilired in Gala
Nei, du bisch mit dinere Zuegänglichkeit
Äs Härz vo de Schaffhuuser Kultureinheit.
Ich säg der ez so ganz im Vertraue:
Mich tunkts Züri töi üüsi Idee chlaue!

Spinnerei - Zaaredli gsesch Paralele
Isch doch offesichtlich! Cha niemer verheele!
Aber äbe - bloss e chlini Stadt ond enne am Rhy
Maaned di andere ... debii!
Schiitlibiige - Dameriege - neiaberau
Lüüchtürm hämmir i üüsem Kulturviertel ganz genau!

S'Museum Allerheilige wird bald i neuem Glanz erstrahle
Ond du liebi Kammgarn lüüchtisch wiit au ohni Misswahle
Mit de Galerie Vebikus, em KiK Programm i voller Brunscht
Jazzfestival, IWC-Museum, sid 25 Johr Halle för neui Kunscht!
D'Weltstadt Züri brüschtet sich mit siner Kulturmaile
Mir händs nid nöötig üüs dänewäg z'begaile

Üse Kulturviertel isch i handlicher Grössi
Verglichbar mit de Kreditcharte i ihrer Blössi
Hmm, säged mer d'Kreditcharte sei di chlii Stadt
Die einen Micro chip zum Kulturviertel hat
Drom hämmir ka Puff mit de Geographie
Ez los emoll da, wo füehert dänn da hii

Früener häts ghaase landuf ond landab, vo hinne noch führi
de Maag produziri sini Zaaredli im wilde Wäschte vo Züri.
Ez sägeds aber, die Maag-Event-Halle
Ligi a de Kulturmeile im Soho - chasch du da Schnalle?
sKultur Mekka sei die Zaaredlihalle im wilde Wäschte
Aber Mekka, mini Liäb, liit doch im Oschte!

Aber sich om jede Priis zProfiliere isch durchuus en Tränd
Wo au i üüser Gegend chuum Gränze kännt.
- Erinnerisch dich an Hirschhorn à Paris?
D Plakatständer sind abgrummt - de Wahlkampf vorbii ....
Ich will der säge liebe Kammgarn ich bi froh
Da de 21igscht Oktober hät chöne is passé goo

Zom Ergäbnis säg ich ezed nüüt
Da überloni de andere Lüüt
Wamer im Moment meh ztänke giit
Sind d'Stichwort us de Wahlkampfziit:
Klima - Energie - Bänke
Jugendgwalt ond am Rand no chli Bilding - giit der da nid au z'tänke?

Vo Kulturfördering find me ka Spur!
Ond wa isch es Thema vo de nörschte Legislatur?
Äs Bundes-Kulturförderingsgsetz!
Di kantonale Kulturdirektore kämpfed - me gsehts -
För d'Onderstützing vo Glüehwürm
Ähhhh äxgüsi natürli vo Lüüchttürm!

Aber villicht ischs för üüs alli än grosse Säge
Da näämer hät welle Kultur in Wahlkampf träge
Stell der moll vor liäbi Kammgarn a Stelle vo dir
Verwaltingsbüro oder freii Sicht a d'cote d'Azur
He nei, natürli no bis an Rhii
so wiitsichtig chönnd nid moll d'Schaffhuuser sii

So etz hör ich aber mit Lamentiere
cho bini nämlich zom dir gratuliere
Leider chan ich nid so guet singe
drom möchte ich dir d' Glückwünsch vo der Regiiring so überbringe
es s isch mir en Ehr dir ä Gob z'übergäh
in däm Couvert inne - du wirsch es gsäh

die frischverabschiedet Leischtingsveriibaring vom Regiiringsroot
wo als Gschänk en liicht erhöhte Johresbiitrag vorschlooht
ond als Mäschili drufue
decket d'Schtadt ond mir dini Schulde zue!
Dir ond diner Creew vil Glück ond Säge
uf dine erfolgriiche Kammgarn-Wäge!